A Fundación CIEC inaugura o ano artístico con dúas mostras colectivas de gravado contemporáneo A Fundación CIEC de Betanzos acolleu a inauguración simultánea de dúas exposicións colectivas que poñen en valor a diversidade e a excelencia do gravado contemporáneo: ACOTÍO, protagonizada por artistas da Asociación Ambar, e a mostra resultante do XII Encontro Alfara-CIEC. O […] A Fundación CIEC inaugura o ano artístico con dúas mostras colectivas de gravado contemporáneo A Fundación CIEC de Betanzos acolleu a inauguración simultánea de dúas exposicións colectivas que poñen en valor a diversidade e a excelencia do gravado contemporáneo: ACOTÍO, protagonizada por artistas da Asociación Ambar, e a mostra resultante do XII Encontro Alfara-CIEC. O
A Fundación CIEC de Betanzos acolleu a inauguración simultánea de dúas exposicións colectivas que poñen en valor a diversidade e a excelencia do gravado contemporáneo: ACOTÍO, protagonizada por artistas da Asociación Ambar, e a mostra resultante do XII Encontro Alfara-CIEC. O acto de apertura contou cunha “sesión vermú”, concibida como un espazo distendido de encontro e diálogo entre artistas, alumnado e público xeral.
“ACOTÍO”: o talento da Asociación Ambar
Unha das grandes protagonistas da xornada foi a exposición ACOTÍO, que reúne oito pezas de punta seca realizadas por artistas con diversidade funcional da área de arte da Asociación Ambar de Ribeira. As obras son froito dun obradoiro intensivo impartido polo mestre gravador Pepe Míguez, baixo a coordinación de Manu Mimé, facilitador da área de arte da entidade.
A mostra reivindica tanto o rigor técnico como a capacidade creativa deste colectivo artístico. O título, ACOTÍO, fai referencia á maneira en que os artistas transforman a rutina e os obxectos cotiáns en elementos esenciais da súa creación. Ademais das estampas finais, a exposición permite contemplar tamén as matrices orixinais, poñendo en valor todo o proceso artesanal. As obras están asinadas por Daniel Piñeiro, David González, Domingo Ruiz, Esperanza Silva, Javier García del Río, Juan Sampedro, Mª Eugenia Reiriz e Mónica Rial.
XII Encontro Alfara-CIEC: diálogo entre obradoiros
De xeito paralelo, a Fundación presenta os resultados do XII Encontro Alfara-CIEC, celebrado o pasado mes de setembro no campo charro salmantino. Esta mostra colectiva recolle o traballo desenvolvido por artistas e alumnado da Fundación durante unha convivencia creativa fóra do seu contorno habitual, evidenciando o vigor expresivo e a alta calidade técnica que caracteriza as formacións do CIEC.
Coa unión destas dúas propostas, a Fundación CIEC reafirma a súa vocación como espazo inclusivo e dinámico, servindo de escaparate tanto para artistas con capacidades diversas como para a nova xeración de gravadores que se forman nos seus obradoiros.
Barbanza-Arousa | O Barbanza
